Сахалыы хоһооннор
Саха тыла  -  13 ноября 2016 14:58   676
Семен Данилов, "Саха үҥкүүтэ"
Е. Степановаҕа
Цитата:
Үрүмэччи үөрүн курдук,
Арыы-дьэҥкир халлаан курдук,
Көөнньөрүүлэх кымыс курдук,
Көҥүл санаа кыымын курдук
Дьоллоох саха кыргыттара
Чороон тутан таҕыстылар.

Ойуу-дьарҕаа тирэҥсэлэр
Оhуор үктээн киирдилэр,
Нуоҕай лабаа ииллиилэр,
Дьол ырыатын тистилэр...
Yөрэ сохпүт санаабар
Алаас тыала ил гынар.

Чуумпу Лена долгунуунуу,
Туундара үрүҥ кубатыныы,
Алаас хотун хатыҥыныы,
Атан эрэр ньургуhуннуу,
Намыыннарын, наскылларын,
Нарыннарын баҕастарын!

Кэрэ бэлиэ кэпсээн курдук,
Сэрэтиилээх сэhэн курдук,
Ылбай чаҕаан ырыа курдук,
Ыраас таптал тылын курдук
Сахам намыын үҥкүүтэ
Сахам сирин кэриэтэ!


Семен Данилов, "Сарсыарда"
Цитата:
Барыҥый халлаантан быкпыт,
Тыҥ хатыыта кырыылаах-
Ол барыйа багдаспыт-
Буор хайалар быhыылаах.

Ыраах өрүһүм дуораанын
Бастакы сиккиэр аҕалла.
Онтон ол уорас дуораанныын
Уостан уҕараан хаалла.

Чочумча чуумпу кэнниттэн
Сир симэҕэ сибигинээтэ,
Мыраан чыпчаалын сибэккитэ
Көмүс сарыалга сөтүөлээтэ.

Намылхай чараҥ тыалырга,
Эрдэhит чыычаах уhугунна,
Сарсыарда, намыын сарсыарда,
Саҥа күнэ аhылынна.

Саҥа күн күлүмэх күлүмэр
Умайар халлаан бэрдин!-
...Саҥа күн күлүмэх түбүгэр
Мин умсарга бэлэммин.Бастакы хаар хоhооҥҥо олоҕуран



Семен Данилов, "Маҥнайгы хаар"
Цитата:
Сыhыылар сырдыктар,
Чараҥнар наҕыллар,
Аан дойду сүктэр кыыс
Таҥаhын таҥынна:

Сүктэр кыыс кэриэтэ
Кыырпаҕа суох ыраас,
Сүктэр кыыс кэриэтэ
Хаар намыын үҥкүүтэ.

Мин суолга наадыйбат
Айанньыт буолабын.
Мырааны быhабын,
Чагдаҕа тахсабын.

Туллуктар суолларын
Көрөммүн үөрэбин,
-- Туллуктар! Эй, кэлин!
Мин үтүө киhибин.


Семен Данилов, "Таптаа"
Цитата:
Таптаа, бу сир оҕото
Таптаа сири, халлааны!
Yрдүк үөрүү, хомолто
Таптыыр сүрэх талаана.
Таптыыр сүрэх араарар
Куhаҕантан күндүнү,
Кини эрэ бас билэр
Сибэккини,
Дьолу,
Күнү.

Таптаабатах сүрэххэ
Дьон,
Сир,
Олох-барыта
Бороҥ буолан көстүөҕэ,
Чуҥкук буолуо барыта.

Таптаа дьон, сир кэрэтин!
Таптаа!..
Таптаа күн курдук,
Чуҥкук олох кэриэтин
Олорботох да ордук.

Yрдүк үөрүү, хомолто
Таптыыр сүрэх талаана.
Таптаа, бу сир оҕото,
Таптаа сири, халлааны.


Семен Данилов, "Ийэбэр"
Цитата:
Ийээ, эйигин билэбин,
Эн таптыыр сүрэҕиҥ сылааһын,
Кини сылааһа дэлэйин—
Бар дьону кууһарын.
Суохтуур буоллум эн амарах
Сылаастан сылаас харахтаргын,
Былыр миигин суулуур хара
Эн былаатыҥ минньигэс сытын.
Дьоллоох дьону көрдөххүнэ
Бэйэҥ дьолломмуттуу туттаҕын,
Кыһалҕалааҕы биллэххинэ,
Кыһалҕатын сүксэҕин.
Ийэкээ, чахчы кырыйдаҕыҥ
Сааһыҥ да быдан ырааттаҕа,
Арай эн ийэ сүрэҕиҥ
Хаһан да кырдьыа суоҕа.


Семен Данилов, "Индияҕа"
Цитата:
Атын күннэр, атын түүннэр
Ахсааннара аччаата,
Тойон сүрэҕим төнүннэ
Туруйам үөрүн кытта.
Үөһээ ааһар туруйалар
Мин дууһабын аймыыллар,
Ыраас хаардаах тумаралар
Ырыаларын ыллыыллар,
Бу сир олоҕо барыта
Чыха тыап, дьэбис-дьэгин
Мин манна көрдөөн булбатым
Сүрэҕим сүүдүйэрин.
Арай манна бааллар эбит
Мин дойдубун санатар
Кулуннуу кистиир элиэлэр
Уонна сыыдам мурукулар.
Уонна курус харахпынан
Умнаһыттары көрөбүн,
Ол муҥнаахтары аһына
Саха буолбуппуттан үөрэбин.


Семен Данилов, "Сайылык"
Цитата:
Санаабар бу илэ көһүннэ
Сайылык, алтан от сыһыылар,
Үчүгиий-үчүгэй күн үүннэ,
Үүт-тураан, үүт тураан халлааммар.
Тумулга сайылык фермата,
Түптэ күөх буруота унаарар,
Кыталык-кыталык кыргыттар,
Кыргыттар лыах буолан дайаллар.
Санаабар, биир ырыа дьиэрэйэр —
Сайылык аныгы ырыата.
Нап-намыын, нап-нарын үлүгэр
Намчытык тайаарар дорҕооттор.
Барыта киэҥ, холку ол онно,
Барыта уйаҕас, сайаҕас
Ичигиис - ичигэс ол онно,
Салгынныын сымнаҕыыс-сымнаҕас.
Ылаарда мин дууһам, дьоллонно.
Ыллыыбын мичээрдээх ырыабын,
Амарыых-амарах дьоннордоох
Ахтыылаах кыраайбын санааммын.


Семен Данилов, "Ферма кыргыттара"
Цитата:
Билэр дьонум доҕотторун—
Биэс бэһиэлэй кыргыттары
Үөрэ даҕаны мин көрдүм
Үүт-көлүйэ ферматыгар.
Тоҕус былас да буолбатар—
Тохтор долгун суһуохтаахтар,
Туйаарыма Куо да буолбатар
Туналҕаннаах ньуурдаахтар.
Хатыҥ буолан наскылдьыһа
Ханыылаһан тахсаннар
Сайыҥҥы кэми сайыһа
Сайдыы.сайдыы хаамсаллар.
Көрүүй хайдах курдук көрө-көрө күдэ
Үөрэн мичилиһэ тураллар.


Семен Данилов, "Дьүһүннээх үтүөтэ Сибиэтэ"
Цитата:
Түҥкэтэх ферматын суолунан
Дьүһүннээх үтүөтэ Сибиэтэ,
Ньирэйин сүтэрбит уоругар
Дьүһүннүүн дьүдэйэн испитэ,
Үчүгэй Сибиэтэ.
Чараҥҥа тахсыыта иннигэр
Чаага уол баар буола түспүтэ
Чахчыта кыыс истиҥ сүрэҕэр
Чаага уол—үчүгэй уол этэ
Үчүгэй уол этэ.
—    Сибиэтэ! Дорообо!—диэбитэ,—
Сүгэбин сүтэрэн иһэбин...
Киҥнээх кыыс илгистэн кээспитэ,
Эппитэ: «Дьэ тоҕо бэһирдиҥ!
Дьэ тоҕо бэһирдиҥ...»
Уол уоска бэрдэрэн турбута:
—    Оо, уоргуон! Таптыырбын этээри...
Тоҥкуруун кыыс ааста кыбыста,
Таптаһыан баҕарар эрээрн,
Баҕарар эрээри...
Ол күнтэн Сибиэтэ эрэнэ
Уончата ааста ол суолунан,
Уола суох.
Кыыс саныыр кэмсинэ:
«Сүгэтин сүтэрбэт да буолан,
Сүтэрбэт да буолан...»

[Сообщение редактировалось]

Добавить баннер на эту площадку! →
Ответов 18 Написать ответ
  • Саха тыла 13 ноября 2016  

    Алампа, "Ньургунуннааҕар ньуолдьаҕай ньуурдаах"

    Цитата:
    Ньургунуннааҕар ньуолдьаҕай ньуурдаах,
    Ньаалаҕайдааҕар намчы лабаалаах,
    Сибэккитээрэр тэтэркэй имҥээх,
    Күөх уу долгунун курдук
    Күөгэлдьигэс бэйэлээх
    Көмүс доҕорум.
    Хардыылаабакка халбарыйан,
    Атыллаабакка арахсан,
    Уҥа түннүгүм аннынан
    Уу курдук устан
    Унаарыйан ааспыккын
    Одуулаан турбутум,
    Олус уйадыйбытым.
    Онуоха эн,
    Санаабын таппыт курдук,
    Саҥата суох салаллан
    Санныҥ үрдүнэн
    Салаҥ сайаҕастык
    Сандаарыччы көрбүккүн
    Сааным тухары
    Санны сылдьыам,
    Өлуөрүм тухары
    Өйдүү сылдьыам...


    Алама , "Үрүҥ туллук эрэ мөлбөстүүр"
    Цитата:
    Yрүҥ туллук эрэ мөлбөстүүр,
    Маҥан туллук эрэ далластыыр,
    Ыраастыыра эрэ бөлтөрдүүр,
    Доҕойумалыыр эрэ доҕоруом!
    Ылбаҕайдыыр эрэ чыычааҕыам,
    Туохха баҕас туора көрөн,
    Туоххаhыйар эрэ буоллуҥ дуо,
    Туллуктуур эрэ доҕоруом!
    Туналыйар эрэ ньуурдааҕыам,
    Туттаҕардыыр эрэ бэйэлээҕиэм,
    Кыталыктыыр эрэ кыылларга,
    Кытарабын эрэ, кыртайааныам!
    Күлүбүрдэс эрэ дьүhүҥҥүн,
    Күлүмнээн эрэ көрөргүн
    Күннээҕэр эрэ күндүтүк
    Көрөбүн эрэ, көмүhүөм!
    Нарынныыр эрэ тарбаххын,
    Наскыйар эрэ бэйэҕин
    Хатыҥныыр эрэ мастарга
    Ханыылыы эрэ хайгыыбын!
    Субуллар эрэ суһуоххун
    Халлааным эрэ кустугар
    Ханыылыы эрэ саныыбын,
    Хайҕаллаах эрэ киэргэлиэм!
    Томтойор эрэ түөстэргин
    Толорукаан эрэ кутуллубут
    Чорооннордоох эрэ кымыска
    Доҕуйабын эрэ, тоҕойуом!
    Күөгэлдьигэс эрэ бэйэҕин
    Күлэн эрэ күөмчүлүүр
    Күүһүм эрэ суохуйа,
    Күөкэйдиир эрэ көмүһүөм!
    Сайаҕастай эрэ санааҕын
    Саҥабынан эрэ салгытар
    Санаакайым эрэ суохуйа,
    Саргылардаах эрэ саhарҕаам!


    Алампа, "Кэҕэ"
    Цитата:
    Кэлэҕэйдиир куоластаах
    Кэҕэлиирэ кыылларбыт
    Кэтит кэскил олохтоох
    Кэрэлиирэ сайыммыт
    Кэлэригин кэпсиирэ
    Кэрэкэтин эбитин...
    Һу-һуо, һу-һуо, һу-һуо!..
    Күлүмүрдэс күннэрдээх,
    Көҥүлүктүүр олохтоох
    Күөхтүүрүгэ сайыммыт
    Күөрэйэр-көстөр күннэрин
    Күөгэлдьийэ олорон
    Күүгүнүүрэ күндүтүн...
    Һу-һуо, һу-һуо, һу-һуо!..
    Уһуор ойуу оттордоох
    Уруй-туску сайыммыт
    Устар-унаар күннэрин,
    Уйгу-быйаҥ олоҕун
    Ууран-тутан олорон
    Уруйдуура олуһун...
    Һу-һуо, һу-һуо, һу-һуо!..
    Итии илгэ эҥэрдээх,
    Иллэҥ-босхо олохтоох
    Эриэкэстиир сайыммыт
    Эргийээхтиир күннэрин
    Этэ-тыына олороро
    Эриэккэһин эбитин...
    Һу-һуо, һу-һуо, һу-һуо!..
    Сибэккилиир оттордоох,
    Сиэдэрэйдиир олохтоох
    Сэлэлиирэ сайыммыт
    Ситэн-хотон иһэрин
    Сэгэртэйдиир кыылларбыт
    Сэһэргиирэ сэргэҕин...
    һу-һуо, һу-һуо, һу-һуо!..


    Алампа, "Нарынныр эрэ тарбаххын"
    Цитата:
    Нарынныр эрэ тарбаххын,
    Наскыйар эрэ бэйэ5ин
    Хатыңныыр эрэ мастарга
    Ханыылыы эрэ хайгыыбын!
    Субуллар эрэ суһуоххун
    Халлааным эрэ кустугар
    Ханыылыы эрэ саныыбын,
    Хай5аллаах эрэ киэргэлиэм!
    Томтойор эрэ түөстэргин
    Толорукаан эрэ кутуллубут
    Чорооннордоох эрэ кымыска
    До5уйабын эрэ, то5ойуом!
    Күөгэлдьигэс эрэ бэйэ5ин
    Күлэн эрэ күөмчүлүүр
    Күүһүм эрэ суохуйа,
    Күөкэйдиир эрэ көмүһүөм!


    Алампа, "Мин сулуһум"
    Цитата:
    Үрүт буорга үктэниэхпиттэн
    Үрүт өттүбэр үөскээбит,
    Үлүгэртэн өрүһүйээччи
    Үргэл сулус үөлээннэзх,
    Аан дойдуга ананыахпыттзк
    Араҥаччы буоларга ан аммыт
    Араҥас сулус
    Аҥар салаата аргыстаах,
    Төбөм оройугар
    Төгүрүйэн үөскээбит
    Чороҥ соҕотох, дьоллсох
    Чолбон сулус доҕордоох,
    Баарым тохору
    Баһым үрдүгэр
    Батыһа сылдьар
    Маҥан сулус
    Баһылыктаах этим...
    Онтукам
    Хараҥаҕа мунан,
    Харгыска хаптаран,
    Санааҕа ылларан
    Санньыйар күммэр,
    Сандааран биэрэн
    Сайыннарар буолара...
    Буомчаҕа булларан
    Муҥур-соҥур буоллахпына,
    Күрүөҕэ хаайтаран
    Күүһүм күөйүлүннэҕинэ,
    Күндээрэн көстөн
    Күүс угар буолара...
    Хараҕым сабыллан
    Хараҥаҕа харбыалаһан,
    Сиппэххэ түбэһэн
    Силискэ иҥиинэхпинэ,
    Сээкэтийбит санаабын
    Сэргэхситэр буолара...
    Дьоллоох чолбонуом,
    Соргулаах сулуһуом,
    Үеһээ өттүбэр
    Өрө күндээр!
    Чабырҕайым чанчыгар
    Чаҕылыйан сандаар!
    Хараҥаҕа хаайтарыма,
    Харгыска хаптарыма!
    Көстө күндээрэн
    Көхсүбүн көндүөрүт,
    Сандаара сырдаан
    Санаабын сайҕаа!..
    Элбэххэ эппэппин,
    Эйиэхэ эрэнэбин,
    Соботох дьолум —
    Чолбон сулуһум,
    Тосхой, Чугаһаа!
    Арахсыма, аргыстас,
    Айхал-уруй буоллун...

    0
  • Саха тыла 13 ноября 2016  

    Арбита, "Таптыыбын оһуордаах ыйдаҥа"

    Цитата:
    Таптыыбын оһуордаах ыйдаҥа
    Тыла суох имэҥнээх ырыатын
    Сулустан сулуска кыйдаран
    Сүрэҕим дьиктилээх ырыатын
    Таптыыбын тумарык туманы
    Тылбынан курдаттыы сүүрэрбин
    Чынайар чыпчаалга тураммын
    Чэпчэки кынаппын тиирэрбин
    Оһуордаах ыйдаҥа сырдыгар
    Сир-халлаан сибээһин көрөбүн
    Сирдээҕи тапталбыт кырдьыга
    Күндэлэс күлүктэн көрөбүн
    Оччоҕо туран дьэ билэбин
    Кэрэни кэрэхсии кэлбиппин,
    Олоҕу, дьоннору, бэйэбин
    Олустук мин таптыыр эбиппин
    Оһуордаах ыйдаҥа сырдыгар
    Соһуччу көстүбүт кистэлэҥ
    Дарбаннаах сырыыны сылдьыыга
    Чахчылаах эрэлгэ суол тэлэр.
    Таптыыбын оһуордаах ыйдаҥа
    Тыла суох имэҥнээх ырыатын
    Сырдыгы кытта хараҥа
    Силбэһэр көстүбэт кынатын


    Арбита, "Арахсыы"
    Цитата:
    Күөгэйэр күммүнүү
    Кылбайа кыыһар,
    Күлэн күлүмнүүр
    Көр үйэм кыыһа,
    Хотугу дойдум
    Кэрэ киэргэлэ,
    Хоһооммун-тойукпун
    Кэһимэ, киэр диэмэ.
    Эйиигин, мииҥин
    Киэҥ айан суола
    Араарар кэмигэр
    Хайтах буолабыт?
    Кырдьык мин
    Хара түүн харахтаах
    Тайҕа уолабын,
    Мин дьиэттэн арахпыт
    Дьэллик тыал буолабын.
    Эн үүнэр күөх сааскар
    Дьолуҥ чыпчаал үрдүн,
    Хас күҥҥэ, хас часка
    Мин көрөн үөрдүм.
    Көрдүм дьолбун көҕөрдөр
    Күнүм күндү мичигин,
    Кэлэр кэскилим төрдүн –
    Эйигин, сэгээр, эйигин.
    Тэлэһийэр кэмнэрбэр
    Тэһийбэккэ сытабын,
    Дьиэбэр киирэн кэлэргин
    Кэтии-маныы сатыыбын.
    Арыт эмиэ саныыбын –
    Баҕар, кэмниэ кэнэҕэс,
    Кэккэлэһэр-ханыылаһар
    Кэммит тиллэн кэлиэҕэ.


    Арбита, "Ардах иннинэ"
    Цитата:
    Дьулуо маҕан халлааммыт
    Дьурааланар кустуга,
    Чараҥ тыаҕа хайҕаммыт
    Чалах мастыын куустуһар.
    Халлаан эҥил баһыгар
    Хара былыт кэтириир,
    Ыраах этиҥ тыаһыгар
    Чуумпу салгын титириир.
    Талах тыллаах чыычааҕа
    Табыталын хомунар,
    Хойуу будьур лабааҕа
    Саһар сааскы Күөх Унаар.
    Ойуу дьарҕа кустугум
    Оргууй аҕай умуллан,
    Дьураа солко куоссунун
    Туран эрэн хомунар.
    Чуумпу ууну долгуппат
    Сөрүүн салгын чабардыыр,
    Эмиэ ньачаас чуумпурда
    Халлаан Сирии саанардыы.
    Онтон курбуу чаҕылҕан
    Кустук охтуу дуксуйда,
    Саһан сыппыт айылҕам
    Өндөс гынна – соһуйда.
    Уордаах этиҥ эмискэ
    Хабырыттан тыаһаата,
    Хампарыта тэбистэ
    Халлаан кэтит таһаатын.
    Этиҥ тыаһын кытары
    Түргэн тыаллар түстүлэр –
    Хойуу самыыр кутарын
    Дьоннор көрөн үөрдүлэр.


    Алампа, "Барыар түүн усталлар"
    Цитата:
    Барыар түүн усталлар
    Баһа суох ырыалар,
    Сүрэхпэр мусталлар
    Тыына суох ыралар.
    Кырыктаах Бириэмэ
    Кулгаахпар кыланна :
    «Эдэриҥ эйиэнэ
    Өлөргө кыранна!...»
    Оччоҕо бэйэбин
    Мин саҥа билэбин,
    Олорбут үйэбин
    Хайыһан көрөбүн;
    Кэрэгэй кэскилбин
    Киил маска кэрдэбин,
    Баар эрэ кэс тылбын
    Барытын күүрдэбин.
    Минньигэс ыранан
    Бэйэбин албыннаан,
    Үөрүүлээх ырыанан
    Сүрэҕим айманна.
    Дьэ кэлиҥ, дьэ кэлиҕиҥ,
    Илбистэр, кыргыстар,
    Тимириҥ, тимириҥ,
    О, дьоллоох алгыстар!
    Сир муҥнаах төрүөҕэ,
    Эн хааныҥ сүүрэрин
    Хараҕым көрүөҕэ,
    Мичээрдиэ сүрэҕим.
    Бириэмэ бааһырбат:
    Ким өлүө, ким төрүө...
    Өлүҥ да, баҕардар,
    Оннооҕор мин өлүөм!



    Алампа, "Көмүс күрүлгэн"
    Цитата:
    Көрүлүүр көҥүлбүн көлүйэн
    Биир сиргэ мин мэлдьи кэлэбин,
    Көстүбэт күрүлгэн үрүйэм
    Күндү кытылын кэрийэбин.
    Элбэх сибэккилэр бааллара...
    Эриэннэр, маҕаннар, кыһыллар.
    Көрбүтүм – үөһээттэн аллара
    Күндэлэс күрүлгэн ыһыллар...
    Көстүбэт үрүйэ төрдүгэр
    Күрүлгэн көрүлүү турара,
    Умайар сибэккиим үрдүгэр
    Убаҕас көмүһүн кутара.
    Элбэхтэн онно биир сибэккии
    Мин өйбүн-санаабын туппута;
    Мэйиибэр мичээрии бэлэхтии
    Турбута, турбута, турбута.
    Дьоннорго ол аптаах амулет
    Дьолго дэҥ көстөрүн билэбин.
    Булларбын, арай ол абырыа –
    Күрүлгэн иһигэр киирэбин.
    Үрдүбэр – күндэлэс күрүлгэн,
    Анныбар аллараан ытыллар,
    Халысхан дьигискэнэ бэргээн
    Кытаанах уорааннар ытыыллар.
    Долгуттар туос тыыбын мээчиктээн
    Салгын дьэргэлгэнин харбыыллар,
    Кустуктаах бырдааты көөчүктээн
    Фонтаннар санаабын сайгыыллар.
    Ол курдук мин сааһым тухары
    Биир суолу көрдүүрдээх буолбуппун,
    Ол ону – бу чугас турары,
    Бу манна, бу баары – булбаппын.


    Алампа, "Күөрэгэй"
    Цитата:
    Күндээрэр киэҥ килбиэн
    Күндү чуор тыллааҕа,
    Көҕөрөр сааскы кэм
    Күөрэгэй чыычааҕа.
    Көмүстээх сибэкки
    Күөгэйэ турарын,
    Көрүдьүөс кэрэтин
    Көччүтэ туойаҕын.
    Айылҕам көҕөрбүт
    Алыс бэрт кэмигэр
    Күннэрим көччүйбүт
    Күөх илгэм үрдүгэр,
    Салгыҥҥа уйдаран
    Саргылаах ырыаҕын
    Сайылык устунан
    Саҕалаан ыытаҕын.

    0
  • Саха тыла 13 ноября 2016  

    Аскалон Павлов, "Эн бааргын"

    Цитата:
    Мууһурбут сүрэхпин уулларар,
    Муҥутах санаабын суулларар,
    Мэҥэ күөх халлаантан күлүмнүүр
    Мэник тыал тылларбын үлүмнүүр
    Эн бааргын
    Аартыкпын иэйиинэн толорор,
    Айаммын тэтимнээх оҥорор,
    Алҕаспын суһаллык көннөрөр,
    Алгыстаах тойукпун төннөрөр.
    Эн бааргын.
    Күһүҥҥү түүн үөһэ умайар,
    Күндүл киэҥ халааҥҥа угуйар,
    Тулаайах санаабын кынаттыыр,
    Тулабын үөрүүнэн ыһыахтыыр
    Эн бааргын.
    Кыһыҥҥы кылгас күн сүтүүтэ,
    Кыайтарбат үлэбит бүтүүтэ
    Кырыабын тыыҥҥынан ириэрэр,
    Кырдьыктаах тыллары сипсийэр
    Эн бааргын.
    Чээлэй күөх сайын,
    Көмүс дуол күһүн -
    Эн бааргын

    0
  • Саха тыла 13 ноября 2016  

    Сайа, "Сарыал таптала"

    Цитата:
    Дьоро күн көҕүттэн күрэнэ,
    Дьокуускай куораттан ыраата,
    Аалай күн айанын батыһа,
    Сарыалга тапталы саһыара
    Кэрэ да киэһэни сиппиппит,
    Күһүҥҥү чуумпуга тиийбиппит.
    Иккиэйэх киниһи кэтэнэ
    Инийбит курдуга тыа инэ,
    Күн килбик уотунан мичээрэ
    Дьол көмус олбоҕор сирдиирэ...
    Итинник барыта урана,
    Иэйиилээх, иччилээх курдуга.
    Ол кэрэ цуумпуну иһиллии,
    Күһүҥҥү киэһэни кэрэхсии,
    Бу дьылҕа түһүнэн эргиллии
    Кистэлэҥ үөрүүтүн биһирии
    Сүрэҕим тэбэрэ биһиргии
    Аан маҥнай таптаабыт киһилии…


    Сайа, "Билинии"
    Цитата:
    Күн сырдыгын батыһа
    Күөх үүнэрин кэриэтэ
    Эн тапталгын сураһа
    Барыам этэ ханна да
    Саас салгынын кэтэһэ
    Хаар кыстыырын кэриэтэ
    Эн тапталгын эрэнэ
    Туруоруом этэ тугу да
    Дьол сулуһун сурйа
    Түүн бүтэрин кэриэтэ
    Эн тапталгын сайыһа
    Хаалыам этэ бүгүн да

    0
  • Саха тыла 13 ноября 2016  

    Виталий Власов, "Сылгыһыт ырыата"

    Цитата:
    Кулгаахатрын чөрбөҥнөтөн,
    Эргим-ургум тула көтөн,
    Сылгым миэнэ айаннатар.
    Кутуруга сыыйыллан,
    Сиэллэригэ ытыллан,
    Тыйыс тыаллыын хатыллан
    Сылгым миэнэ айаннатар.
    Таныыларын тыанатан,
    Атахтарын кыыратан,
    Тула хаары бурЬатан
    Сылгым миэнэ айаннатар.
    Туйах тыанын бытарытан,
    Силлиэ куунун халбарытан,
    Мииммит дьолбун айаанытан
    Сылгым миэнэ айаннатар.

    0
  • Саха тыла 13 ноября 2016  

    Геннадий Решетников, "Сааскы санаа салгына"

    Цитата:
    Чуумпу киэһэ чуҥкуйдум,
    Сулустары чуҥнаатым,
    Кыырай халлаан угуйда,
    Санаам онно умуста.
    Тэйдим сиртэн эмискэ,
    Тиийдим күннээх сулуска,
    Күүппүт эбит ол онно
    Көрдөөх санаа күлүмэ.
    Көмүс дорҕоон күлүгэ
    Күлүмүрдээн көһүннэ.
    Дьоллоох түгэн дьөрбөтө,
    Көрдөһөбүн сүтүмэ.

    0
  • Саха тыла 13 ноября 2016  

    Умсуура, "Үйэлэр"

    Цитата:
    Үйэлэр - үөр сүөһүлэр.
    Олоххо
    мэччийэннэр тото
    ыанньыйа ыҥырананнар
    аа-дьуо айаннаталлар.
    Ол буолан
    биир да ынах
    төннүбүтэ иһиллибэт.
    Ыаҕайалаах
    ыанньыксыттар -
    остуоруйаһыттар -
    ханнык илик кэм титиигэр
    кэтэһэллэрэ эмиэ биллибэт.
    Ыахтара буолуо да,
    син биир сорох эмиийин
    кыайан тардыахтара суоҕа.
    Ордоруохтара.

    0
  • Саха тыла 13 ноября 2016  

    Гаврил Андросов, "Миҥэм миэнэ..."

    Цитата:
    Күн сирин күлүмэх боотура
    Баабыр кыыл талланын былдьаабыт
    Хабыллар хаҥыл ат арҕаһар
    Хотойдуу хоодуоттук олорон,
    Саһарҕа кутаатын туһаайа
    Буурҕалыы буралла көтөбүн!..
    Халлаантан сууллубут сулустар
    Уохтарын түөһүгэр иҥэрбит
    Иччилээх илбис ат барахсан
    Сүрэхпин уотунан сулуйа,
    Тыҥ хатар тыҥааһын саҕыгар
    Биэтэги билгэлии битийэр!..
    Хомурах хаарынан тэлгэммит
    Үтүмэх көһөҥө көстөрү
    Көөнньүбүт көмүөллүү барчалаан,
    Сындыыһы сыһытар кыахпынан
    Амырыын аал аты айааһаан
    Сарсыҥҥым саҕаҕар ыксыыбын!..
    Куоҥ куйаар улуукан Кудайа,
    Адьарай аймаҕын Аҕата
    Алтыһан алкыйбыт аттарын
    Чаҕылҕан кымньыынан салайан,
    Дьиэгэ суох дьиҥинэн тэһииннээн
    Мөхсүбэт мэҥэтик мииммитим…

    0
  • Саха тыла 13 ноября 2016  

    Алексей Саввин, "Ыйдаҥа"

    Цитата:
    Кыдьымах кырыылаах санныгар
    Ыйдаҥа сырдыгы айара,
    Лыҥкынас тыастарга баайыллар
    Айанньыт ырыатын хайара...
    Онтон мин бу тугу батыһыах
    Омуннаах урааҥхай буолабын,
    Миэхэ суох - ыйдаҥа, кыдьымах.
    Билэбин: дьол миэхэ сойорун...
    Онтон эн, кыдьымах, санныгар
    Эрэллээх аргыһыҥ — ыйдаҥа
    Тохтообот дьол, доҕор аатыгар
    Хаар-биһик ырыатын ыйыаҕа.



    Алексей Саввин, "Тыллыбыт сыгынньах лабааҕа"
    Цитата:
    Тыллыбыт сыгынньах лабааҕа
    Кыһыҥҥы мутукча...
    Үс кутум
    кырыалаах санааҕа
    Кыттыбыт курдуктар...
    Ол иһин
    муус-кырыа салама
    Ыйатар буолбуттар...
    Ол иһин
    тылынна лабааҕа
    Кыһыҥҥы мутукча...
    Ычча!



    Алексей Саввин, "Ытыспар баар оту"
    Цитата:
    Ытыспар баар оту
    Күһүҥҥү аччык тыал
    Ыстаҕа суол хоту -
    Хаалла, бу, сыччах тыл:
    -Суох миэхэ көрдүүрүҥ.
    Таптал суох! Бүппүтэ...
    Умнаһын көтүттүҥ,
    - Харда суох... Күүппэтэ.
    -Дьэ, онон бырастыы!
    - Кураанах ытыспын,
    Аас тыалы харгыстыы,
    Күн хоту уунабын...

    0
  • Саха тыла 13 ноября 2016  

    Ангелина Васильева, "Таптааҥ миигин хайдах баарбынан"

    Цитата:
    Таптааҥ миигин хайдах баарбынан
    Ханнык эмит тоҕойго
    Уруулбун мүлчү туттахпына -
    Буорга-сыыска булкулла сытар диэн
    Сиилиир буолумаҥ, доҕотторуом.
    Көлдьүгэҥҥэ көрүлээн
    Улдьааран хааллахпына -
    Ас тахсыбат киһитэ диэн
    Ахсарбакка ааһымаҥ, атастарыам.
    Алҕас туттан эмискэ
    Ыарыылаахтык оҕуттахпына -
    Бэйэҥ буруйуҥ эрэ диэн
    Киэр хайыһар буолумаҥ, бар дьонуом.
    Мэлдьи мааныбын,
    Далбарбын, дьоһуммун эрэ
    Таптыыр буолумаҥ,
    Хоргуммун, арыыбын,
    Үүтүм үрүмэтин эрэ
    Баһан ылымаҥ.
    Таптааҥ миигин
    Хайдах баарбынан,
    Утары уунарбын
    Киэр илгимэҥ.


    Ангелина Васильева, "Дьылҕам миэнэ "
    Цитата:
    Дьылҕам миэнэ
    Хараҥа түүн
    Түннүк нөҥүө
    Көрөн турар
    Көстүбэккэ.
    Көөчүктүүр курдук
    Көстүүлэринэн:
    Хаһаанар ханна эрэ ыраах
    Дьол, сор кыырпахтарын.
    Кистиир хаһан эрэ көрсүөхтээх
    Дьонум сирэйдэрин,
    Көрдөрбөт суостаах
    Тапталым кутаатын,
    Төрүөхтээх мин оҕом
    Минньигэс мичээрин...
    ...Баран иһиэ мин соҕотох сүрэҕим,
    Ол суолга сүтэриэ:
    Дьонтон сахпыт сылпас кыымнарын,
    Эбэтэр
    Саҥа кыымнары күөдьүтэн,
    Ол итии кутааҕа сыраллыа!
    ...Иннибэр киэлитэ биллибэт киэҥ саҕах…

    0
  • Саха тыла 13 ноября 2016  

    Петр Тобуруоков, "Доҕордоһуу тойуга"

    Цитата:
    Доҕордуу дьоҥҥо
    Ыарахан чэпчиир
    Доҕордуу дьоҥҥо
    Ыраах да чугаһыыр
    Ким хорсун доҕордоох
    Ол дьоллоох
    Доҕордуу дьоҥҥо
    Тымныыга сылаас
    Доҕордуу дьоҥҥо
    Куйааска сөрүүн
    Доҕордуу дьону
    Дьон – сэргэ таптыыр
    Доҕордуу дьону
    Ийэ сир хайгыыр


    Петр Тобуроков, "Биирдэ мэник туохтаабыт"
    Цитата:
    Биирдэ мэник ийэтэ
    Үүт ыллара атаарбыт,
    Ону мэник бэйэтэ...
    Туохтаан баран, туохтаабыт?
    Иһэн баран, ытаабыт.
    Биирдэ мэник аҕата
    Ыыппыт кэмпиэт ыллара,
    Ону мэник уол хата...
    Туохтаан баран, туохтаабыт?
    Сиэхтээн баран, ытаабыт.
    Биирдэ мэник убайын
    Быһыччатын былдьаспыт,
    Онтон арай тарбаҕын...
    Туохтаан баран, туохтаабыт?
    Быстан баран, ытаабыт.
    Биирдэ ыалын куоскатын
    Мэник сырса сылдьыбыт,
    Онтон саҥа ыстаанын...
    Туохтаан баран, туохтаабыт?
    Хайа көтөн, ытаабыт.


    Петр Тобуруоков, "Баай" оҕо"
    Цитата:
    Сиидэркин түөһүгэр,
    Сэттэ-аҕыс сиэбигэр,
    Бартыбыал иһигэр
    «Баай» диэн үлүгэр:
    Токуйбут тоһоҕо,
    «Токууккай» тобоҕо,
    Туос тууйас оҕото,
    Туой оҕус сотото,
    Дьэбиннээх ылтаһын,
    Тиит мастан хаптаһын,
    Кэнсиэрбэ бааҥката,
    Хоруопка хаппаҕа,
    Алдьаммыт бытыылка —
    Араас уон балыыҥка!
    Сиэптэрин айаҕа
    Сиритэ барбыттар,
    Бартыбыал муннуга
    Тэһиттэн хаалбыттар,
    Баайдара, маллара —
    Барыта быкпыттар!
    Тэтэрээт, кинигэ
    Сордоммут киһитэ:
    Үс хонук иннинэ
    Үрэллэр «бэйэтэ».
    мэнигийээн-мэникчээн
    Мэнигийээн-мэникчээн —
    Михайлов Филипчээн
    Оскуолаттан тахсаатын,
    Олбуор аанын ааһаатын
    Ойуоккалыыр, ыһыытыыр,
    Оҕолору хатыйтыыр.
    Ити ыты сырыста,
    Илби түһэн арахта,
    Ол куосканы батыста,
    Уонна хаста оҕутта,
    Хаатыҥката баллайда,
    Хайыһардыы хантайда.
    Киэһэ тиийэн кэлбитэ,
    Ийэтигэр киирбитэ:
    Уолуктара нэлэстэр,
    Тимэхтэрэ мэлистэр.


    Петр Тобуроков, "Эһээ бытыга"
    Цитата:
    — Эһээ, маннык бытыгы
    Эн хантан ылбыккыный?
    — Сиэним сыыһаа! Хас сылы
    Олорбуппун бэлиэтээннэр,
    Биирдии үрүҥ түү — кылы
    Ый, күн эбэн испиттэр.
    — Эһээ, маҥан баттаҕы
    Эн хантан ылбыккыный?
    — Сиэним уолчаан! Хас хаары
    Аһарбыппын ааҕаннар,
    Биирдии көмүс хаарчааннары
    Үгүс сыллар сыһыарбыттар,
    — Эһээ, тоҕо эн сүүһүҥ
    Кэрдиис суола үгүһүй?
    — Сиэн көмүһүөм! Хас ыардары,
    Хас эрэйи ааспыппын
    Хаһанын да умнумаары
    Бэлиэтээн хаалларбыппын.
    — Оттон, эһээ, эн сүүһүҥ
    Аахпатах дуу үөрүүгүн?
    — Үөрүү да син үгүһүн
    Эн иэдэспэр көрөҕүн,
    Ол онно баар дьураалар
    Дьол суоллара буолаллар!
    ХАСТАРЫЙ?
    Ийэлэрэ аҕаларыныын,
    Аҕалара ийэлэриниин,
    Эбээ, эһээ сиэннэриниин,
    Сиэнчээннэрэ эбэтиниин,
    Уоллара кэргэниниин,
    Кэргэнэ Сэмэнчиктиин
    Арай баран испиттэр,
    Аара тохтуу түспүттэр...
    Ааҕааччы атастарым,
    Ааҕыҥ эрэ хастарын?



    Петро Тобуроков, "Амма уола"
    Цитата:
    Амма уола
    Кылаҕаркаан харахтаах,
    Даллаҕаркаан кулгаахтаах,
    Дьону бары сыллыы сылдьыах
    Тимэх саҕа муруннаах.
    Амма уола
    Лоппоҕоркоон сүүсчээннээх,
    Чорбоҕоркоон уосчааннаах,
    Тумул арыы буолуох курдук,
    Көстөр бэлиэ мэрдьэннээх.
    Амма уола
    Тахсан эрэр күн курдук
    Төгүрүкчээн төбөлөөх,
    Дьону бары үөрдэ сылдьыах
    Сырдык, сылаас мичээрдээх.


    Петр Тобуроков, "Алта ыйын туола илик..."
    Цитата:
    Алта ыйын туола илик
    Айаал утуйа сытар,
    Ол да сыттар бу бэдик
    Сутуругун сууланар...
    Уосчааннарын чомурҕатар,
    Түһээн эмиий эмтэҕэ,
    Күлүм гына мичик гынар,
    Тото эмэн үөрдэҕэ.
    Харыта диэн сөмүйэттэн
    Лаппа кыра чахчыта,
    Пеленкатын илитэн
    Кээспит эбээт, бадаҕа...
    Хайаатын да! Таптыыбын —
    Сүрэҕим дыр-дыр гынна:
    Коммунизм бухатыыра
    Бу тыыллаҥныы сыттаҕа!


    Петр Тобуроков, "Күнү кытта оонньуубут"
    Цитата:
    Күнү быһа биһиги
    Кими кытта оонньуубут?
    Күнү быһа биһиги
    КҮНҮ кытта оонньуубут!
    Күөх хонууга бардахха
    Күлүк буолан хаамсыһар,
    Ойуур устун хаамтахха
    Мас быыһынан батыһар.
    Кэннигинэн турдахха
    Кэтэхпитин сылытар,
    Иннигинэн буоллахха
    Иэдэспитин ититэр.
    Сарсыарда аайы турдахха
    Аһаппакка ыҥырар,
    Утуйаары сыттахха
    Саһан хаалан кыһытар.


    Петр ТОбуроков, "Чычыып-чаап"
    Цитата:
    Кып-кыра
    Чычып-чаап
    Хап-хара
    Харахтаах.
    Кып-кыра
    Чычып-чаап
    Чап-чараас
    Кынаттаах.


    Кып-кыра
    Чычып-чаап
    Түп-түргэн
    Сырыылаах.
    Кып-кыра
    Чычып-чаап
    Үчүтэй да Чыычаах!



    Петр Тобуроков, "Тоҕо?"
    Цитата:
    Тоҕо күммүт тыгарый?
    — Сирбит сылаас буоллун диэн.
    Тоҕо сирбит сылыйар?
    — Бурдук бөҕө үүннүн диэн.
    Тоҕо бурдук үүнэрий?
    — Килиэп, буулка буолуун диэн.
    Тоҕо буулка буоларый?
    — Оҕом аһаан, тоттун диэн.
    Тоҕо тото сатыыбыный?
    — Күүстээх-уохтаах буолуум диэн.
    Тоҕо күүстээх буолабыный?
    — Тракторы ыытыым диэн,
    Самолекка көтүүм диэн,
    Муораларга устуум диэн,
    Киһи бэрдэ буолуум диэн!


    Петр Тобуроков, "Эрдэ турбут оҕолор"
    Цитата:
    Эрдэ турбут оҕолор
    Элбэхтик да оонньууллар,
    Хойут турар оҕолор
    Куоттараахтаан ытыыллар.
    Эрдэ турбут оҕолор
    Мээчик хапса сылдьаллар,
    Хойут турар оҕолор
    Кус сыгынньах сыталлар.


    Петр Тобуроков, "Саха ааттаах кыргыттара "
    Цитата:
    Саха ааттаах кыргыттара
    Таас дьиэлэргэ саспыттара,
    Тоҕус былас суһуохтара
    Субуллубат буолбуттара,
    Урааҥхайдар уолаттара
    Тимир аты мииммиттэрэ,
    Улуу тунах ыһыахтарга
    Уруйдаммат буолбуттара
    Син балай да ыраатта…


    Петр Тобуроков, "Өндөрүүскэ биригэдьиир"
    Цитата:
    Кырыа кыһын кээлтигэр
    Кыстык хотон сиппэтэх,
    Кыһытыаҕын иннигэр
    Биригэдьиир билбэтэх.




    Өндөрүүскэ биригэдьиир,
    Өндөрүүскэ тыла биир:
    - Өссө хойут буолбатаах,
    Өлөн эрэр сүөһү суох,


    Үчүгэйдик тэрийиэм,
    Үс күнүнэн бүтэриэм.
    Харалдьыттар тахсаллар,
    Хаар типтэрэр үлэни


    Хаалларбатын туһугар
    Хаһыаттыыллар кинини.
    Өндөрүүскэ биригэдьиир,
    Өндөрүүскэ тыла биир:


    - Өссө хойут буолбатаах,
    Үрэх мууһа уолбатах,
    Үчүгэйдик ыыттахха,
    Өр гыныллыа дуо, ама.




    Ыаллыы турар колхозка
    Ыһыы үлэтин үгэнэ,
    Онтон кини үлэҕэ
    Отой хойут киирбитэ.


    Өндөрүүскэ биригэдьиир,
    Өндөрүүскэ тыла биир:
    - Үлэ куобах буолбатаах,
    Үргэн куотуох буоллаҕай,


    Үчүгэйдик тэриниэм,
    Үс былааны толоруом.
    Бытааныттан салҕаннар,
    Быыбар уопсай мунньаҕар,


    "Өр күүттүбүт", - дэһэллэр,
    Үлэтиттэн эһэллэр.
    Өндөрүүскэ кыһаммаат,
    Өндөрүүскэ тыла биир:


    - Өсөһүөххэ сатаммат,
    Үтүө көҥүл быһыынан
    Үлэбиттэн бардым диэн
    Үгүс дьоҥҥо киһиргиир


    Петр Тобуроков, "Хаппытаан"
    Цитата:
    Хаппытыан, Хаппытыан,
    Хонтуораҥ кыратыан,
    Хотонуҥ тымныытыан,
    Ынаҕыҥ ырбытыан!
    - Хаалары саҥарар
    Халлаан да дьоноҕут,
    Ахсынньы тымныытын
    Ама да хайыамый?!

    0
  • Саха тыла 13 ноября 2016  

    Байаҕантай, "Кэлэр дуу, кэлбэт дуу автобуһу кэтэһэн "

    Цитата:
    Кэлэр дуу, кэлбэт дуу автобуһу кэтэһэн
    турдубут ардах анныгар илийэн.
    Сарсыардааҥҥы сэргэх тыал үрэйэн
    тойонноммокко хаалла бөөлүүҥҥү түүл.
    Күһүҥҥү күн былыт кэтэҕэр да таҕыстар
    өссө биирдэ хараҥаны киэр кыйдаатаҕи.
    Эн миигин эмиэ оннук умуннаҕыҥ.
    Эн түүлүҥ түү курдук чэпчээтэҕэ.
    Эн көхсүҥ кэҥээтэҕэ, хараҕыҥ сырдаатаҕа
    Эн санааҥ дуоһуйдаҕа күннээҕи олоххуиам
    Ол онтон мин үөрүөх эрэ тустаахпын.
    Умнуллуу минньигэс амтана тигистэҕэ
    халы-мааргытык да буоллар мин олохпор.
    Арай күһүн кэллэ да, күлбүт киһи көстүбэт
    Талкы курдук тилигирээн-талыгырааи
    тиийэн кэллэ автобуспут абыраан.

    [Сообщение редактировалось]
    0
  • Саха тыла 13 ноября 2016  

    Уххан, "Киэн туттуом этэ"

    Цитата:
    Эн мичээргэр эйэргиир күлүүбүн
    Эн манньыйар дьоһууҥҥар үөрүүбүн
    Тиэрдэрим эбитэ буоллар
    Киэн туттуом этэ тапталбынан
    Эр бэйэм эрэли түстүүр аналбынан
    Эн олоххор эйэҕэскин толорор         
    Эн кэрэҕин кэҕиннэрбэт харысталбыпан
    Чүөмчүлүүрүм эбитэ буоллар чөлгүн
    Киэн туттуом этэ тапталбынан
    Эр киһи олоҕу түстүүр аналбынан
    Эн ийэ буолар аналгын толорор         
    Эн ыраҥ туоларыгар буолар саталбыпнм
    Түстүүрүм буоллар төлкөҕүн
    Махтаныам этэ дьылҕабар
    Эр киһи буолан олоҕу айбыт аналбын



    Уххан, "Көстүбэти көрүүй"
    Цитата:
    Мин этиэхтээх санаам
    бу көстүбэт эйгэҕэ
    уста сырыттаҕа...
    Мин туолуохтаах баҕам
    ыралардаах туонаҕа
    кэтэһэн турдаҕа...
    Ханнык көтүгэн санаам
    түү куорсунугар уйдаран
    мин онно тиийиэминий,
    Истибэти истиий,
    ситтэрбэти ситиий,
    көстүбэти көрүүй...

    0
  • Саха тыла 13 ноября 2016  

    Варвара Потапова, "Билбэтим, ол мин оҕо сааһым түүлэ эбитэ дуу"

    Цитата:
    Билбэтим,
    Ол мин оҕо сааһым түүлэ эбитэ дуу,
    Эбэтэр
    Тыа сирин кыараҕас кулуубугар
    Кылам гынан ааспыт үөрүү буолуо дуу?
    Хайдаҕын да иһин,
    Билигин да
    Мин харахпар субу баардыы,
    Көстөн кэлэр, уонча сылы курдаттыы,
    Мин үрүҥ түүллээх олоҕум
    Баар-суох бастыҥ булумньута:
    Хараҥа күөх халлааҥҥа харбаспыт
    Хойуу лабаалаах үрдүк мас аттыгар
    Үүт маҥан дьахтар нуоҕайан турара,
    Хара долгун суһуоҕун намылытан,
    Үп-үрүҥ илиилэрин оргууй далбаатаан,
    Үтүрүйэр курдуга сиртэн хара санааны, хомолтону...
    Бүтүн бэйэтэ сырдык үөрүү буолан,
    Туналыйар этэ өлгөм күөх ортотугар.
    Мин истэ иликпин кыталык ырыатын,
    Уонна да өссө элбэх истэ, көрө илигим —
    Итэҕэйэбин ол барыта миигин күүтэрин.
    Билиэҕим сиргэ баар кэрэни барытын,
    Ол да кэннэ умнуом суоҕа букатын
    Ол үрүҥ санаа курдук ыраас дьүһүннээх
    Үүт маҥан дьахтар алыптаах тойугун.
    Үйэм тухары умнуом суоҕа, андаҕайабын.
    Ол ырыаҕа иһиллэр курдуга
    Киэҥ холку халлаан муудараһа, кистэлэҥэ,
    Күөх сирэм үөдүйбүт үрдүк өрөгөйө,
    Кини сирн көрбүт эрэ дьолго аналлааҕа...
    Ол ырыа тылларын өйдөөбөппүн.
    Арай өрүү саныыбын кини сырдык тыынын,
    Ол иһин, дьулуһар баҕам чөмчүүгэ буолан,
    Мин баҕарабын ол минньигэс ырыанан ыалдьыахпын.
    Хомойуу, хоргутуу
    Түгэҕэ биллибэт дириҥ далайын да өҥөйөн туран,
    Өрүү өйдүү сатыыбын мин ол тойугу.
    Оччоҕо эрэ мин, уоскулаҥы булбуттуу,
    Умсан ылабын өрүкүйүү долгураҥар.
    Мин сөтүөлүүр курдукпун ол кэмҥэ
    Күн сырдыгын көмүс сардаҥаларын көлүччэтигэр.
    Оччоҕо эрэ дууһам ыраастыйар,
    Билбит уонна билбэтэх айыым-харам суураллар.
    Ол дьахтар — мин умсугуйар улуу доҕорум,
    Ол тойук — мин сырдыкка сирдиир сулуһум.
    Мин санаам бары салаалара
    Салҕанан барыахтарын баҕарабын,
    Ол ырыа алыптаах дорҕоонноругар бигэнэн,
    Ыйдаҥа ыраах саһыарбыт кистэлэҥнээх чуумпутун
    Иһиллээн көһүйбүт мастар кэтииллэрин кэриэтэ,
    Мин дууһам долгуйан тыалырдаҕына, —
    Тыа суугунун, былыттар харсыһыыларын санатар тыллар
    Миигиттэн төрүүллэрин туһугар,
    мин иһиллиэм ол ырыаны?


    Варвара Потапова, "Эбэм миэхэ кэпсээбитэ"
    Цитата:
    Эбэм миэхэ кэпсээбитэ:
    Улуу ойууттар өллөхтөрүнэ —
    Буурҕалар улуйа хараасталларын,
    Мастар санньыйа хоҥкуһалларын,
    Сулустар бэл барыаралларын...
    Кини миэхэ өссө эппитэ:
    Ытык кырдьаҕаһы көмнөхтөрүнэ —
    Ыйдаҥа түүннэр ытыылларын,
    Тунаархай санньыары ыһалларын,
    Ойуурдар хараҥаны курданалларын...
    Арай мин бас бэринэн охтуум —
    Күһүҥҥү тыйыс өксүөҥҥэ:
    Араҕас сэбирдэҕи кутурҕанынан
    Аргыый сиргэ намылытарынан
    Мунчаарыа дуо мэник тыалым?
    Отчут-масчыт дьонум, уруум,
    Хаайтаран олорон өһүөҥҥэ,
    Сибэкки өрөгөйдөөх ыһыаҕынан
    Симиэхтэрэ дуу сатыылларынан?—
    Оччоҕо мин мичийэн ыллыаҕым!..

    0
  • Сахастрелец
    Сахастрелец 16 ноября 2016  

    Кыыс суолун оһуордаах тиһигэ... С. Руфов.

    Сарсыарда саһарҕа кыыспыта
    Күн уота күүһүрэ илигэ...
    От сиигэр хараара сыппыта
    Кыыс суолун оһуордаах тиһигэ...

    Ол суолга киэҥ-киэҥник түһүөлээн
    Уол суола бырдааттаан кэлбитэ —
    Кыыс суолун кытары кэккэлээн
    Уол суола харааран испитэ.

    Икки суол кэккэлии хаамсаннар
    Иллээхтик харааран иһэннэр,
    Эмискэ холбоһон бараннар
    Соҕотох суол буола түһэллэр...

    Ыбылы көтөхпүт кыыһынаан
    Уол суола талахха киирбитэ —
    Тапталы саһыаран киэҥ халлаан
    Туналҕан сабыытын тиирбитэ.

    Кыра да сиккиэр тыал суоҕуттан
    Уу чуумпу этэ да — ымсыыра,
    Имэҥнээх таптаһыы уоҕуттан
    Көҕүйбүт күөх лабаа хамсыыра...

    0
  • Сахастрелец
    Сахастрелец 18 ноября 2016  

    (*!*)

    "Хомолто". Сайа.

    Мин үрдүбэр хаһыс сылын
    Түһэр, түһэр таас ардах,
    Хотуппата ол эрэн
    Алҕас биир да таас таммах.

    Хомолтону илдьэ сылдьар
    Оо, хобдоҕуон, куруһуон.
    Хоп - сип тааһын хомуйар
    Оо, билэҕиэт улуутуон!

    Улуу киһи курдук ааппын
    Уос номоҕор булабын,
    Умуллубат кутаа уоппун
    Мин Сунтаарбар оттобун!

    Дьон саҥата сылайбакка,
    Арахпакка, ааспакка
    Айах тутар кэлэр кэмҥэ,
    Ону бэйэтэ да билбэккэ.

    Хомолтобун хоспор илдьэ
    Хорҕойдум дии соҕотох,
    Хоп - сип хаалла уулуссаҕа-
    Онно элбэх доҕотторо.

    Хоһоонум аайы хомолто
    Оһуордуура туох буолуой,
    Хаһыс сылын таас ардах
    Таммалыыра туох буолуой?

    Сайа

    Эттилэр ини эппэтилэр,
    Сэрэттилэр ини сэрэппэтилэр...

    Ол эрэн син биир,
    Ол эрэн синэ биир:
    Оол, күрүө нөҥүө эрэ
    Ордук минньигэс
    Отон үүммүт.
    Оол, бүтэй нөҥүө эрэ
    Бүччүм кэрэ кэтэспит.

    Оол, уҥуор, уҥуор эрэ
    Дьоро олох долгуйбут.
    Оо, уоруллубут эрэ
    Улуу дьолго холоммут!

    Кистэлэҥ таптал!
    Хаптаҕас уута
    Хабархай ааттал...
    Хаппахчы иһэ
    Хаайыылаах саатал...

    Айыыһыт алҕас
    Алҕаабыт суола
    Ааттаммат алаас
    Аартыгар тиэртэ...

    Күрүөйэх үөрбүт
    Күлүгэ үөмтэ,
    Уоруйах буолбут
    Сүрэҕим тэптэ!

    Тугунан да бүттүн
    Уотунан оонньуу,
    Кыл тыына дьолтон
    Кынаттаах буолуу...

    0
Ответ на тему: Сахалыы хоһооннор
Введите код с картинки*: 
Авторизуйтесь чтобы не вводить код каждый раз.
* Код состоит только из русских букв (кириллицы), если совсем непонятно, кликните на картинку — выйдет новый код
grinning face grinning face with smiling eyes face with tears of joy smiling face with open mouth smiling face with open mouth and smiling eyes smiling face with open mouth and cold sweat smiling face with open mouth and tightly-closed eyes smiling face with halo smiling face with horns winking face smiling face with smiling eyes face savouring delicious food relieved face smiling face with heart-shaped eyes smiling face with sunglasses smirking face neutral face expressionless face unamused face face with cold sweat pensive face confused face confounded face kissing face face throwing a kiss kissing face with smiling eyes kissing face with closed eyes face with stuck-out tongue face with stuck-out tongue and winking eye face with stuck-out tongue and tightly-closed eyes disappointed face angry face pouting face crying face persevering face face with look of triumph disappointed but relieved face frowning face with open mouth anguished face fearful face weary face sleepy face tired face grimacing face loudly crying face face with open mouth face with open mouth and cold sweat face screaming in fear astonished face flushed face sleeping face dizzy face face without mouth face with medical mask face with no good gesture face with ok gesture person bowing deeply person with folded hands raised fist raised hand victory hand white up pointing index fisted hand sign waving hand sign ok hand sign thumbs up sign thumbs down sign clapping hands sign open hands sign flexed biceps
  
Предложения и замечания